Këtë verë, Ingridi, vajza pas blogut BonVivant, bëri një udhëtim fantastik në zonën e Pulies dhe na ftoi në një mbrëmje me gatime nga kjo zonë në shtëpinë e saj. Darka ishte fantastike, burrata, mocarela, sallatë oktapodi, pasta me karkaleca dhe domate të thara, dhe verë fantastike.
Unë kisha për detyrë të sillja ëmbëlsirën, e cila duhet të ishte në lartësinë e duhur krahasuar me gjithë mrekullitë më lartë kështu që iu futa kërkimit.
Ndërkohë që po kërkoja për receta nga zona e Pulies, më mbeti mendja tek Emiko Davies, blogu i së cilës është shumë i dashur e i ëmbël, dhe plot me receta të shijshme, kryesisht italiane, edhe pse jo nga zona e Pulies por nga pjesa fiorentine e Italise.
Zgjodha të gatuaj këtë tortë me çokollatë, dardha dhe lajthi nga libri i saj Florentine.
Zgjedhja ishte e duhura, çokollata dhe lajthitë shkojnë shume bashkë, ndërkohë që dardhët i shtojnë një prekje shumë delikate tortës. Mendoj se një prekje pijesh alkoolike, si psh. ti shtojmë pak rumë ose konjak brumit, ose të gatuajmë dardhat në verë në vend të ujit do ta bënte edhe më interesante në shije. Nuk i kam testuar këto opsione ende, por mendoj që do funksionin mirë, kështu që nëse i provoni më shkruani si iu dukën.
Kjo tortë kërkon miell lajthishë, që për fat të mirë e kisha nga udhëtimi i fundit në Paris. Nëse nuk e keni në shtëpitë tuaja, kjo nuk duhet t’iu pengojë aspak ta gatuani këtë tortë. Mjafton që të kaloni në blender lajthi dhe ti bluani deri sa të bëhen miell.
Torta doli shumë e bukur e me një aromë fantastike, dhe kishtë vlerësime shumë të mira online nga të gjithë që e kishin gatuar, kështu që isha e sigurt që ishte shumë e mirë dhe i kërkova leje miqve që ta prisja para se ta coja në darkë, pasi doja ta fotografoja. Pra, si përfundim çova një tortë jo të plotë në një darkë me miqtë, që për fat u treguan mirëkuptues.
Tortë me çokollatë, dardhë dhe lajthi
Prep
Cook
Total
Yield 8-10 persona
Një ëmbëlsirë e shkëlqyer ku çokollata dhe lajthitë kombinohen shumë mirë bashkë, ndërkohë që dardhët i shtojnë një prekje shumë delikate.
Ingredients
Për dardhat
- 2 dardha mesatare
- ¼ kupë sheqer
- 2 kupa ujë
Për tortën
- 150 g çokollatë e zezë
- ½ kupë lugë gjelle sheqer
- 90 g gjalp
- 1 kupë miell lajthish
- 3 vezë
Instructions
- Parangrohni furrën në 180 gradë Celsius.
- Përgatisni një tepsi rrumbullake me diametër 20 cm me gjalp dhe letër pjekjeje
- Pastroni dhe qëroni dardhët dhe pritini secilën në 8 feta.
- Bashkoni ujin me sheqerin në një tigan me bazë të gjerë dhe vendoseni në zjarr mesatar në të lartë. Shtoni fetat e dardhës dhe lërini të gatuhen për rreth 12-15 minuta. Kullojini dardhat nga shurupi dhe lërini mënjanë.
- Shkrini çokollatën në banjo-mari, hiqeni nga zjarri dhe shtoni gjalpin.
- Trazojeni përbërjen deri sa gjalpi të jetë shkrirë plotësisht.
- Shtoni sheqerin dhe miellin e lajthive dhe trazojeni përbërjen mirë.
- Ndërkohë ndani të bardhat e vezëve nga të verdhat.
- Kontrolloni nëse përbërja e çokollatës është ftohur disi dhe shtoni të verdhat e vezëve dhe trazojeni mirë.
- Në një tas të madh të pastër shtoni të bardhat e vezëve dhe rrihini deri sa të formohen maja të forta.
- Me shumë kujdes trazoni të bardhat e rrahura me pjesën tjetër të brumit.
- Hidheni masën në tepsi dhe sipër shtoni dardhat e gatuara më parë dhe zhytini pak në brum.
- Piqeni për rrëth 30-35 min ose deri sa nëse shponi me një kunjë në mes të tortën të dal e pastër.
- Lëreni tortën të ftohet plotësisht para se ta zhvendosni nga tepsia dhe ta konsumoni.
Notes
Shënim : 1 kupë = 240 ml
Mendoj se po ti shtoni pak rum tortës, ose po gatuani dardhët në verë shija do bëhet shumë interesante, por nuk e kam testuar akoma.
Receta është përshtatur nga Emiko Davis.
Lini një Përgjigje