Kur fillova te kërkoj për sultjashin u habita me faktin që gatuhej në gjithë botën, e çdo vend kish mënyrën dhe emrin e tij. Mund ta gjeni si “Arroz con leche” në Spanjë, “Budino di riso” në Itali, “Risogallo” në Greqi, “Sütlaç” në Turqi, Sultjash or Tameloriz në Shqipëri apo “Duadhapak” në Indi.
E bukura e sultjashit është thjeshtësia e tij, në gatim dhe në shije. Kjo e fundit të lejon të eksperimentosh me erëza dhe element të tjerë shoqërues. Disa nga erëzat e mia të preferuara janë kanella, arra e moskatit, kardamomi apo vanilja, ose të gjitha së bashku. Dhe sigurisht, përherë shtoj fruta të thata sipër si arra, bajame apo fëstëk.
Receta e sultjashit që po ndaj me ju është ajo me të cilën jam rritur e që për mua është shumë e dashur. Te lista e gjërave që duhet të provoj patjetër është edhe versioni indian aromatizuar me shafran dhe pasuruar me fruta të thata, kështu që besoj që do shkëmbejmë mendime dhe eksperienca sërish, së shpejti për këtë gatim.
Përbërësit
Për 8 persona
- 1.4 litër qumësht me yndyrë të plotë
- 1 kupë sheqer
- 1 kupë oriz kokërr shkurtër
- 1 lugë çaji (tsp) ekstrakt vaniljeje
- 1 lugë çaji (tsp) kardamom pluhur (opsionale)
- Kanellë dhe arra për ta shoqëruar sipër
Shënim : 1 kupë – 1 filxhan/gotë me volum 240 ml
Përgatitja
- Vendosni qumështin dhe orizin në një tenxhere të madhe në temperaturë të lartë dhe lërini të ziejnë.
- Në momentin që përbërja ka arritur pikën e zierjes uleni temperaturën dhe lëreni përbërjen të ziej në zjarr të ulët deri sa përbërja të jëtë bërë kremoze dhe e mpiksur, për rreth 40-45 minuta.
- Shtoni sheqerin, vaniljen dhe kardamomin, trazojeni mirë dhe lëreni të gatuhet për 5-10 minuta.
- Ndajeni përbërjen në enët në të cilat do ta shërbeni dhe lëreni të ftohet plotësisht.
- Më pas vendoseni në frigoriferi për të paktën 2 orë.
- Shërbejeni të ftohtë me kanellë dhe arra sipër.
