Një nga gjërat më të bukura të blerjes së një shtëpie të re ka qenë njohja me njerëz të rinj të profileve te ndryshme, që na ndihmuan ta bëjmë shtëpinë një vend të këndshëm e të dashur.
Një nga këta personazhe interesante ishte Roni, një djalë i zhurmshëm e plot energji i cili na ndihmoi të montonim mobiljet. Një nga punët e shumta që Roni kishte bërë ishte kuzhinier në një restorant të vogël peshku, dhe pasi filluam të flisnim gjatë për gatimin biseda ngeci te supa me domate me vezë poshe sipër. Ideja mu duk fantastike, si nuk e kisha menduar më parë.
Shija e supës me domate bëhet edhe më fantastike kur bashkohet me vezën poshe të gatuar lehtë. Dhe pjata kalon nga një supë e thjeshtë në një vakt të plot. Është e shkëlqyer për darke ose për drekë shoqëruar nga një sallatë e bukë integrale.
Vera është momenti më i përshtatshëm për ta gatuar këtë supë duke qenë se domatet janë në kulmin e tyre dhe të gjithë jemi në kërkim të vakteve të lehta. Nëse doni receta të tjera të thjeshta dhe të shpejta mund të gjeni shumë zgjedhje në blog.
Përbërësit
Për supën
- 1 qepë e vogël
- 2 speca të kuq
- 4-5 domate mesatare (mund të zgjidhni mes varieteteve të domateve që iu pëlqejnë)
- 2 kupa ujë
- 1 lugë gjelle pastë domateje (opsionale)
- Kripë
- Piper
- ½ lugë çaji kumin pluhur (opsionale)
- ½ lugë çaji spec djegës i tharë (opsionale)
- 2 lugë gjelle vaj ulliri
- ½ kupë krem qumështi (pana gatimi)
Për vezët
- 4 vezë
- Ujë për të gatuar vezët
- 1 lugë caji uthull
Shënim : 1 kupë – 1 filxhan/gotë me volum 240 ml
Përgatitja
- Prisni qepën në copa të imta dhe lëreni mënjanë.
- Pastroni dhe prisni specat në copëza të vogla.
- Hiqini lëkurën patateve dhe pritini në copa mesatare dhe vendosini mënjanë.
- Në një tenxhere mesatare gatuani qepën me pak vaj ulliri deri sa të humbasi ngjyrën e të bëhet disi transparente.
- Shtoni specin dhe gatuajeni për 2-3 minuta të tjera.
- Shtoni domatet dhe gatuajini për 10-15 minuta.
- Shtoni pastën e domateve dhe ujin dhe vendosini të ziejnë (zierja duhet të jetë e butë), për rreth 30 minuta.
- Ndërkohë që supa po gatuhet filloni të përgatisni vezët poshe një e nga një.
- Në një tigan të thellë, ose tenxhere të vogël vendosni ujin të ziej (soba duhet të jetë ndezur në nxehtësinë mesatare).
- Pasi uji ka filluar të lëshoj bulëza të vogla, pa mbërritur pikën e vlimit shtojmë pak uthull.
- Hapim vezët një e nga një dhe i hedhim në një enë të vogël p.sh. një filxhan çaji.
- Mundohemi të krijojmë një vorbull uji ne tiganin me ujë ku do hedhim vezën. Me pas hedhim vezën duke u kujdesur që e bardha të jete e para që bie në kontakt me ujin e nxehtë. E lëmë vezën në ujë për 2-3 minuta nëse duam ta gatuajmë pak ose 4 minuta nëse e duam më kompakte. Më pas e heqim nga uji dhe e vendosim mbi një pjatë me letër kuzhine në mënyrë që të thithi ujin. Sipër i shtojmë kripë dhe piper.
- E përsërisim proçesin për të gjitha vezët.
- Pas rreth 30 minutash hiqeni supën nga zjarri dhe bëjeni krem me një blender dore.
- Shtoni vajin e ullirit, kripë, piper, specin djegës dhe kumin.
- Ndajeni supën në enët që do ta shërbeni dhe shtoni vezën poshe sipër.
