Qumësht bajamesh i bërë në shtëpi

Share

Ka pak kohë që kam filluar të eksperimentoj me qumështin me bazë bimore. I pari që kam provuar ishte qumështi i tërshërës, që kishte një rezultat fantastik, sidomos i ngrohur pak me kakao dhe shurup panje.

Pas tij, eksperimentova dhe me qumështin e bajameve. Rezultati ishte thjesht “uau”. Më pëlqen çdo gjë te ky qumësht, shija, konsistenca, aroma. Qumështi i bajames mund të përdoret në smoothie, kafe, për të përgatitur qumështin e artë me tumerik, aq të famshëm për vetitë e tij antiinflamatore, për të përgatitur kakao, e shumë të tjera, pak a shumë si qumështi me bazë shtazore.

Përgatitja e qumështit të bajames në shtëpi është shumë e thjeshtë. Mjafton të lini bajamet të zbuten në ujë për 1 natë, të ndërroni ujin e të shtoni ujë të freskët dhe ti kaloni në blender për pak minuta. Lëngu i kulluar nga përbërja është qumështi i bajames. Mund ta pasuroni shijen duke shtuar erëza si kanellë, apo vanilje, ose ta ëmbëlsoni pak me mjaltë apo shurup panje. Mua personalisht më pëlqen versioni i pastër, ku ajo që dominon është shija e bajames.

Shijon shkëlqyer shoqëruar me biskotat me tërshërë dhe arra, mini-kekë me boronicë dhe mund të përdoret si zëvendësues i qumështit të zakonshëm kur përgatisni tërshërë që e lini gjatë gjithë natës në frigorifer.

Përbërësit

Për rreth 3 kupa qumësht bajamesh

  • 1 kupë bajame, idealisht të rritura në kushte organike
  • 5 kupa ujë (2 për të lënë bajamet në ujë dhe 3 për ta përdorur për qumështin)
  • Pakëz kripë

Shënim : 1 kupë – 1 filxhan/gotë me volum 240 ml

Përgatitja

  1. Lërini bajamet zhytur në 2 kupa ujë për gjatë gjithë natës në frigorifer.
  2. Kullojeni ujin dhe shpëlajini dhe një herë me ujë të pastër.
  3. Hidhini në blender, shtoni tre kupa ujë dhe pakëz kripë.
  4. Bluajini për 1-2 min, në shpejtësi maksimale, deri sa bajamet të jenë grirë plotësisht.
  5. Kullojeni lëngun duke përdorur një napë, ose si në rastin tim sitën e miellit, duke u munduar të merrni sa më shumë lëng, pra ta kulloni sa më mirë.
  6. Lëngu i përftuar është pikërisht qumështi i bajames, i cili mund të ruhet në një shishe qelqi të mbyllur hermetikisht deri në 2 ditë në frigorifer.

Brumin/pulpën që mbetet mund ta përdorni në forma nga më të ndryshmet, ta shtoni në tërshëren e mëngjesit, ta shtoni në smoothie, ta shtoni në brumin e kekut apo biskotave që do gatuani apo ta përdorni në salcën e makaronave. Herën e fundit që bëra qumësht bajamesh thjesht i shtova pak mjalt dhe e konsumova direkt. Ishte fantastike.

Recetat e Mandarina në email-in tuaj

Vendosni adresën e email-it tuaj për tu regjistruar.

Lini një Përgjigje